Shadow

Bacolod EOC kag MBCCI indi pabor nga dulaon ang RT PCR test sa mga travel requirements magpa Bacolod

Ginpanugyan sang Department of Interior and Local Government kag Department of Tourism ang pag streamline sang travel requirements sang tanan nga local government units para mabalik ang turismo sa ti-on nga ipaidalum na ni presidente rodrigo duterte sa modified general community quarantine ang tanan nga mga banwa, siudad kag probinsya sa bulan sang Marso.

Pero indi pa magsugot ang presidente nga ibutang sa MGCQ ang bug-os nga pungsod tubtub wala pa mabakunahan ang publiko para sa COVID-19.

Isa sa mga travel requirements nga ginaduso sang DILG nga ipakuha amo ang pag require sang negative RT-PCR test result.

Ang Bacolod City ang wala na karon naga require sang negative RT-PCR result bilang isa sa mga travel requirements sa pagsulod sa siudad kun gikan ang isa ka persona sa iban nga bahin sang Western Visayas.

Sa pagsinapol ni Bacolod Mayor Evelio Leonardia sa mga opisyales sang iban nga probinsya, iya ginpahayag nga indi pa nagakadapat nga dula-on ang negative RT-PCR result sa mga naga inabot sa Bacolod kag ipadayon lang anay pagpatuman sang naplastar na nga travel requirements sang siudad.

“Daw ang gusto ya ni Mayor Bing nga message ya is gusto ya for Bacolod City ya kung ano ang workable nga natabo na sa Bacolod i-status quo lang so ang aton ya nga executive order number 1 series of 2021 wherein we came up with our consolidated travel guidelines should be in place man gihapon,” suno kay Dr. Chris Sorongon, deputy for medical, Bacolod EOC.

Para naman kay Vice Mayor El Cid Familiaran, mas maayo kun sundon lang anay ang kasubong nga travel requirement bangud may mga lugar pa sa iban nga rehiyon nga may mataas nga kaso sang COVID-19.

“Before diri kita ga swab and quarantine diba? subong more or less daw mas halog na gani na nga mga requirements,” suno kay Familiaran.

Para naman sa Metro Bacolod Chamber of Commerce and industry, luyag man nila nga magdamo ang turista kag mabalik ang ekonomiya sang siudad pero indi pa sila handa sa karon nga magrisgo nga dula-on ang negative RT-PCR test requirement bangud kun magdamo liwat ang mga kaso sang COVID-19 sa siudad maapektuhan sa gihapon ang mga negosyo.

“Kun pareho kamo modified gcq pwede pero kun ang imo ya quarantine status mas taas-taas lain man to ya kay budlay isa na ka tuig ang aton pagsakripisyo para nga madula ni ang virus nga makagwa kita ti ipilak ta lang,” suno kay Frank Carbon, chief executive officer, MBCCI.

Ginpahayag naman sang DOT nga magadepende sa gihapon sa local government unit ang desisyon sa pagpahalug sang ila nga travel requirements para sa mga turista bangud mas nakahibalo ang mga lokal nga opisyales sang sitwasyon sa ila tagsa ka mga rehiyon.

Leave a Reply

Your email address will not be published. Required fields are marked *

Secured By miniOrangeSecured By miniOrange