Nagbakal na sang 20 ka oxygen tanks ang siudad nga gintalana sa isolation facility sa Barangay Alijis.
Suno kay Dr. Chris Sorongon,deputy for medical data and analysis sang Bacolod Emergency Operations Center,kabahin ini sang pagpanghanda sang siudad sa kahangawa nga tuga sang Covid-19 Delta variant.
Siling pa Sorongon, may sufficiente nga supply sang oxygen tanks ang siudad. Pero nagapangabay sila sa publiko nga kun mahimu ipaiway ang hoarding ukon ang pagtago sang oxygen tanks.
Magluwas abi sang risgo mas kinahanglanon ini sang mga medical institution kasubong sang mga ospital karon nga may pandemic.
Ginkabig na nga low risk area ang siudad sa bahin sang kampanya kontra sa Covid-19.
Pero pinaagi sa executive order sang alkalde, ginhugtan na ang pagpatuman sang border kag travel restrictions sa Bacolod makaligad nga na-detect ang duha ka mga kaso sang Covid-19 Delta variant sa probinsya sang Iloilo.
Gin ako sang katapo sang EOC nga apektado ang siudad sa ginapatuman karon nga mas hugot nga quarantine measures sa Panay Island.
Pero padayon ang ila paghinyo sang paghangup sa publiko ilabi na sa pagsunod sang minimum health standard protocol agud nga indi lubos nga maapektuhan ang healthcare system sang Bacolod kasubong sang nagakatabo karon sa mga kaiping nga probinsya tuga man sang pagsaka sang kaso sang Covid-19.