Nagpahanumdom sa publiko ang pamuno sang Environmental Sanitation Division sang Bacolod City Health Office nga si Dr. Grace Tan nga ipabilin ang katinlo sang palibot agud makalikaw sa makakamatay nga masakit kaangay sang dengue kag leptospirosis ilabi na nga nagsugod na ang tig-ululan.
Suno kay Tan, agud makalikaw sa leptospirosis, tinguhaon gid nga magsuksuk sang protective shoes ukon botas kun indi malikawan nga mag-ubog sa baha.
Gilayon man nga hugasan sang habon kag matinlo nga tubig, ilabi na sa may mga pilas ukon open wound sa tiil.
Dugang pa niya, sigurohon man nga indi magdugay sa basurahan ang mga food waste bangud masami ini nga gina-amag sang mga ilaga.
Kon magdamo ang mga ilaga sa palibot, nagasaka man ang posibilidad nga makuha sang tagbalay ang masakit nga leptospirosis.
Sa pinaka-ulihi nga datos sang CHO, nagsaka sang 116.7 percent ang kaso sang leptospirosis sa siudad kon ikumpara sang tinalikdan nga tuig. May 13 na ka kaso nga na record sa siudad kag may duha naman nga ginakabig nga probable death.
Samtang nagpanugyan man ang CHO nga maglikaw man sa pag-tipon sang tubig nga posible mangin breeding ground sang lamok nga nagadala sang dengue.
As of June 13, may 189 na ka kaso sang dengue sa siudad kag nagapanguna diri ang Barangay Mansilingan kag Barangay Singcang-Airport nga may tig-23 na ka kaso.
“So kon damo gani lamok sa palibot it means may breeding place nada sila. It doesn’t mean nga manawag gid dayun sa CHO for pest control. It doesn’t mean ha kay indi kami pest controller. Please take note kon may damo lamok, it is the obligation na sang aton households, sa aton nga facility, sa aton nga institutions, pangliboton tanana regularly kag pang kwaon ang mga stagnant nga tubig kay amo na siya ang ginahalinan sang damo nga lamok. Kon may pitik pitik may lamok gid ina siya”, suno kay Tan.
[sibwp_form id=1]