Ginabulubanta nga 30 tubtob 40 porsyento sang mga tricycle nga nagabyahe sa siudad sang Bacolod ang ginakabig sang Bacolod Transport and Traffic Management Department nga “colorum” ukon wala sang nagakaigo nga dokumento para makabiyahe.
Sumugod sang natapos na ang Business One Stop Shop ukon BOSS, may 49 na ka mga tricycle ang nadakpan sang BTTMD sumugod Abril 1 tubtob 30.
27 sa mga nagkaladakpan ang wala sang mga business permits samtang 22 naman ang wala sang mga driver’s license.
Ginsiling ni Atty. Reuben Mikhail Sabig, pamuno sang BTTMD, nagapadayon ang ila nga anti-colorum operations sa tanan nga mga dalanon sang siudad. Ila ginahatagan sang daku nga pagtamod ang pagdakop sa mga colorum kag mga tricycle nga nagalabay sa mga mayor nga dalan sa siudad.
Suno kay Sabig, indi pwede ang mga tricycle sa downtown area kag dalan Lacson.
Magluwas sini, kahapon lamang may lima ka mga tricycle ang gin-impound sang BTTMD bangud kulang ini sa mga dokumento kag nagalapas sa mga pagsulundan sang siudad.
Sandig man sa rekord, may 6,000 ka mga tricycle drivers ang nagabyahe sa siudad apang kapin sa 3,000 palang ang tigayon nga naka renew sang ila mga permits.
Pangabay ni Sabig sa mga drayber, iparehistro ang ila mga tricycle agud mangin legal na ang ila nga pagbyahe.*
[sibwp_form id=1]