Mando sang reinstatement sa mga empleyado sang Bacolod City Water District nga damlag pa ginpahalin bangud sang redundancy ang nabatun sang tagdumalahan sang Hwebes sang aga.
Suno kay Engr Michael Soliva, ang acting general manager sang Baciwa, nagapati sila nga indi pa man final and executory ang mando sang Civil Service Commission sa pagpabalik sa mga natungdan nga empleyado.
Ang CSC resolution nga gin promulgate sang Agosto 20 kag ginlagdaan ni regional director for Visayas, Nelson Sarmiento nagmando nga ang mga gin terminate nga mga empleyado dapat iga reinstate “without loss of seniority and shall be entitled to full pay from the tme of their separation until actual reinstatement”.
60 ang apektado sang redundancy, pero isa diri ang casual, 59 ang regular nga mga empleyado, kag sa 59, siyam ang nag avail sang early retirement package nga gintanyag sang baciwa sa ila, kasunod sang joint venture agreement sini sa PrimeWater Infrastructure Corporation suno kay Soliva.
As of press time, gina pat-od pa ang mangin legal nga tikang sang Baciwa angut sa amo nga desisyon sang CSC suno kay Soliva.
Paathag sang manager, nga ang mga position sang mga ginpahalin nga mga empleyado yara pa man pero ang isa sa ginalantaw nila amo nga ang mga functions sini ang nadula na bangud sang pagsulod sang PrimeWater.
Nov 16, 2020 nag sugod ang primewater sa operation. December 31, 2020 na terminate ang mga natungdan nag empleyado.