Ginpahayag ni Mayor Albee Benitez nga ang katapo sang board of directors sang BACIWA amo ang natalana mag patuman sang performance review sang PrimeWater may kaangtanan sa natukod nga Joint Venture Agreement.
Nagligad lang nga tuig sang ginpabutyag sang alkalde sa pamunuan sang BACIWA nga dapat ipatuman ang penalidad sa PrimeWater natungod sang kapaslawan sini nga ma-deliver ang 24/7 nga water supply sa mga water consumers sang siudad.
2020 sang natukod ang Joint Venture Agreement sa tunga sang Baciwa kag PrimeWater angut sa Financing, Development, Improvement, Rehabilitation, Expansion, Operation and Maintenance of the Water Supply and Septage Management Systems.
Samtang sa pagsinapol sang alkalde upod sa pamunuan sang Baciwa-PrimeWater kag Negros Power iya ginmando ang pagpadasig sang paghikot sang mga requirements agud matigayon na nga madeliver ang 3 million liters a day nga supply sang tubig gikan sa Matab-ang River Bulk Water Supply Project.
Ini ang kabahin sa mga solusyon sa ginpatigayon nga Water Summit agud mapahagan-hagan ang epekto sang tig-ilinit sa supply sang tubig.