Isa sa mga gina lantaw sang Ayala Group of Companies nga posible investment sa probinsya amo ang sa Renewable Energy – labi na ang solar power.
Ini suno kay Negros Occidental Governor Eugenio Jose Lacson base sa ila nga pag istoryahanay ni Fernando Zobel de Ayala nga nag courtesy visit sa iya kaina sang aga.
Suno kay Lacson, isa sa mga napamangkot ni Zobel de Ayala amo ang mga land area sa probinsya nga sarang magamit para sa solar farms, bagay nga suno kay Lacson dapat sa tag-iya sila sang duta maga pakig-angut.
Gina lantaw nila suno kay Lacson ang 100 MW nga solar energy kag nagakasayuran nga mga 100 hectares man sang duta ang ginakinahanglan. Samtang, may showroom man para sa BYD nga naga baligya sang hybrid kag pure electric vehicles nga iga butang sa Talisay City.
Ang Ayala ang official distributor sini.
Nalantaw man sang gobernador nga mahimo sa palaabuton maka angkon man ang probinsya sang kasubong nga mga electric vehicles para sa Capitol Cab.
Upod ni Zobel de Ayala sa pag bisita sa Kapitolyo Probinsyal ang mga Chief Executive Officer sang Ayala Group.
May Client Appreciation Event ang Ayala Group nga natalana sini nga hapon.