Nagkalakakas ang makina kag iban pa nga parts sang itom nga Hyundai nga awto matapos makabunggo sa pader sa higad sang national highway nga sakop sang Crossing Tuguis sa banwa sang Pontevedra, Negros Occidental, Miyerkules nga adlaw, Agosto 13.
Base sa traffic investigation, madasig ang pagpadalagan sang 25-anyos nga driver sang itom nga awto. Bangud may nakasugata, siya ang naglikaw kag nakabunggo sa pader.
Apesar nga total wreck ang salakyan, maswerte nga minor injuries lamang ang naangkon sang driver nga residente sang Sitio Pahilanga, Barangay Miranda, Hinigaran, Negros Occidental.
Padulong sur nga bahin sang highway ang awto.
Ginsiling ni Capt. Darryl Kuhutan, hepe sang Pontevedra Police, gindala sa ospital ang driver kag sa karon ang nakapauli na.
Magluwas sa awto, nawasak man ang pader sang isa ka residente sa lugar.
Suno sa mga pumuluyo, maswerte nga wala sang tawo sa higad sang dalan kag bag-o lang nakalumbos ang tricycle nga may mga sakay nga estudyante.
Sa karon, wala pa makuha ang wasak nga salakyan sa lugar sang insidente.
Ang dalan sa Crossing Tuguis ang naga kurbada kag may 4-lanes.
“Indi gid siya ma’am accident-prone. Depende gid ya sa driver kay kung defensive driving kag bal-an mo da nga may crossing, indi gid ta ma-disgrasya. Kay usually nga nagaka-disgrasya dira mga indi taga diri sa Pontevedra kag medyo aggressive mag-drive, kay four lanes na da mong. Dapat may kwan ka gid dira.. kumpleto naman dira sa warning signs, nagadepende gid sa driver”, suno kay Kuhutan.