Awto nawad-an sang gasolina sang nasangit sa guba nga manhole sa Araneta Street sa Barangay Singcang-Airport sa Bacolod.
Sa video nga gin-post sa social media ni Bea Mae Ong makita ang pagtagas sang gasolina sa ila ginasakyan nga salakyan nga nasangit sa guba nga manhole sa Araneta street sang Lunes sang gab-i.
Istorya ni Ong sa Isugid mo kay Mayor sa FMR Bacolod 91.1, papauli na sila kuntani sang iya bana sang mabatyagan ang paglagabog sang ila salakyan.
Wala nila ginlauman ang nawasak ang tambutso kag ang gas tank sang ila salakyan nga naigo sang nahuslo nga angle bar sa guba nga manhole nga ila naagyan.
Nagpakig-angut na ang mag-asawa sa Department of Public Works and Highways.
Ginpahayag ni City Legal Officer Atty. Romeo Carlos Ting, Jr., may salabton ang contractor sang DPWH sa natabo nga aksidente.
Nanawagan man siya sa mga traffic personnel sang BTAO nga dapat gilayon i-report kag i-monitor ang mga dalanon nga may kasubong nga problema agud nga ini ang gilayon matagaan atensyon kag mapaiway ang disgrasya.