Sa sini nga CCTV video makita nga naga panaug sang isa ka lalaki sa gina sakyan nga motor sa gwa sang isa ka hardware sa Barangay Maao sa Bago City sang kahapon.
Iya ginsipa ang ini nga lalaki nga naka green nga long sleeves. Sang makita sang magulang nga si Efraim Alinsoring iya ini nga gin balusan ang lalaki. Natumba pa ang suspek kag gilayon nga nagbangon kag nag gabot sang pusil. Gintiro niya ang biktima kag nag hingagaw palagyo.
Napatay si Alinsoring.
Suno kay Senior Master Sargeant Job Ogares, chief investigator, away sa parking space sa gwa sang isa ka hardware ang gin halinan sang pag lalisay sang utod sang biktima kag sang suspek.
“Simple lang gid na tani nga bagay parte lang gid na ya sa kung sin-o bala ang una naka parking sa sulod mismo didto sa atubangan sang KC Hardware. So didto nag nilalisay ni sila ni Jomel Alinsoring, utod sang napatay, siguro basi naghabuyanay ni sila sang istorya bala nga indi man malain sa pamatian so amo to eh,” suno kay Ogares.
Sa hot pursuit operation, tigayon nga nadakpan sang kapulisan ang gunman nga ginkilala kay jonas Luhan. Sa ospital naman naaresto ang iya hinablos nga naga dala sang motor nga si Renejon Flores.
Suno sa PNP, si Flores ang natiruhan sang army nga yara man sa lugar kag nakakita sang natabo.
Nangin sunod sunod ang insidente sang pagpaniro kag kalabanan natabo nga naga butlak pa ang adlaw kag samtang may comelelec gunban.
Sang Domingo lang, tatlo ka mga persona man ang napatay sa ambush sang domingo. Isa ka semana antes sini gin ambush man ang mga pulis sang mga katapo sang NPA. Gani plano sang Negros Occidental Police Provincial Office nga dugangan pa gid ang mga checkpoints kag ang pag patrolya sang mga pulis para mapa hagan hagan ang sunod sunod nga
Wala pa matumod ang rason sa natabo nga ambush sa San Carlos samtang pasakaan naman sang Bago PNP sang kaso nga murder ang suspek sa pagpaniro sa Bago.