Philippine Army ginpabakod ang monitoring sang ila units sa Visayas kasunod sang pagpang bomba sa Marawi City.
Publiko gina panawagan man nga mangin mabinantayon Nagdangat na sa 11 ka persona ang napatay sa pagpamomba sa Gymnasium sang Mindanao State University sa Marawi City.
Suno sa militar, improvised explosive device ang gingamit sa pagbomba. Gin ako sang Islamic State nga militante nga grupo ang pagpamatay.
Ang Philippine Army sa Visayas ang nagpagwa na sang pahayag nga naga panawagan sa ila nga mga tropa nga pabakuron pa gid ang intelligence monitoring.
Suno sa kay LTC J-Jay Javines, Chief sang 3rd Division Public Affairs Office sang Philippine Army, indi man nila luyag nga pahugon ang publiko pero mas maayo na lang nga mangin mabinantayon sa posible nga spill over ukon paglab-ot diri sa Visayas sang mga terorista nga grupo.
Naka handa ang army para sa mga amo sini nga bagay suno pa kay Javines.
Kinahanglan lang gid nga pabaskugon ang pagkuha sang impormasyon tuhoy sa mga naga sinulod nga grupo sa kabisayaan.
Dugang pa ni Javines naga binuligay sila sang PNP para sa intelligence monitoring kag labi nga gina bantayan ang matawo nga mga lugar ilabi na karon nga bulan sang Disyembre.
Ang mga pantalan, simbahan, airport, bus terminal, merkado kag mga siudad.
Naga pangayo man ang army sang kooperasyon sang publiko nga kun may ma monitor nga suspicious looking ukon maka duluda nga mga perso sa ila nga mga lugar ukon may ginbilin nga mga maka duluda nga bagahe nga gilayon ipahibalo sa otoridad.
” If they have suspected person doing daw lain nga tulukon, daw suspicious, i-report nila sa aton kapulisan. Pag may nakita sila nga abandoned packages sa mga terminals, mga ka duda-duda nga mga karton, cellophane, mga amo sina, i-report man nila gilayon sa aton kapulisan, sa aton ka soldadohan para ma aksyonan”, suno kay Javines.