Patay ang isa ka corporal matapos gintiro sang isa man ka upod niya nga army sa sulod sang kampo sang Charlie Company sang 15th Infantry Battalion sa Sitio Barasbarasan, Barangay Manlucahoc, Sipalay City Lunes sang gab-i.
Wala nakaluwas si Corporal Arnold Sumaribus matapos nga gin-alegar matiruhan ni Sgt Charlie Labihit. Ang duha ang pareho nga naka-assign sa Charlie Company sang 15th IB.
Suno kay Police Lieutenant Colonel Reynante Jomocan, hepe sang Sipalay City PNP, ululupod inum ang duha bangud nga birthday sang ila kaupod, nagbaisay sila tubtob nga nagsakitanay na.
Samtang naga-pukutay, gina alegar nga nag gabot sang armas si Labihit kag gintiro ang biktima nga naigo sa iya wala nga kamot kag naglab-ot sa nawala nga dughan.
Ginhingagaw pa dala sa Sipalay City Infirmary and Birthing Clinic ang biktima apang gindeklarar nga dead on arrival. Suno kay Jomocan, 9mm pistol ang gingamit sang suspek sa pagtiro sa biktima.
Kaina sang kaagahon nagsungka si Labihit sa otoridad bitbit ang iya pusil.
Sa karon ginahanda na sang Sipalay PNP ang kaso nga homicide batok sa suspek.