Nagakaagnas na sang nasapwan ang bangkay sang walo ka tuig nga biktima sa Sitio Omot, Barangay Santol banwa sang Binalbagan sang Sabado.
Suno kay Police Major Jun Ray Batadlan, hepe sang Binalbagan PNP, Martes nga adlaw sang nadula ang biktima apang Biyernes na sang nag-report ang mga ginikanan sa PNP.
Sabado nga adlaw sang nagpadulong ang mga pulis sa lugar kag nagpatigayon sang imbestigasyon.
Nasapwan sang mga tanod sa katubohan ang bangkay sang biktima nga positibo naman nga ginkilala sang mga ginikanan.
Suno kay Batadlan, ila gin-imbitar sa istasyon ang 14 anyos nga tiyo sang biktima kag iban pa nga himata bangud sila ang ulihi nga nakit-an nga kaupod sang biktima.
Nag-ako ang tiyo nga siya ang naglabo sa iya nga hinablos nga ginahalinan sang iya kamatayon.
Pero wala niya man sini matumod kun ano ang rason niya sa pagpatay sa bata.
Narekober pa ang bayo sang 14 anyos nga may dugo. Ang tiyo ang yara sa karon sa kustodiya sang DSWD-Binalbagan.
Desidido ang pamilya sang biktima nga magpasaka sang kaso batuk sa suspek.