Mayor Albee Benitez ang magahinyo sang approval sang konseho para sa road closure sa natalana nga car-free Sundays sa Lacson Street. Nagpadala na sang letter of request si Mayor Albee Benitez sa katapo sang Sangguniang Panlungsod para mapahanugutan ang natalana nga road closure halin sa bangga Ramos asta sa South Capitol road sa dalan Lacson.
Magasugod ini las singko sang kaagahon asta las nuebe sang aga kada Domingo sa bulan sang Hunyo para sa ipatuman nga car-free Sundays sa Bacolod.
Suno kay Secretary to the Mayor Atty. Karol Joseph Chiu may yara sang minor rerouting nga ipatuman. Ini ang kabahin sa nangin rekomendasyon sang Bacolod Traffic Authority Council nga ipatuman ni Mayor Benitez agud mapasanyug ang kampanya para sa ikaayong lawas kag pagpangapin sa palibot.
Ang katapo sang Metro Bacolod Chamber of Commerce and Industry ang nagpabor sa amo nga lihok ilabi na nga kadam-an sa mga negosyante ang matagaan kahigayunan nga magserbe sa mga joggers kag pedestrians nga amo ang makabenepisyo sa ipatuman nga car free Sunday sa Hunyo 9, 16, 23 kag 30.