Na-rescue sang Philippine Coast Guard ang anum tanan ka mga mangingisda matapos naglugdang ang ila bangka Domingo sang aga mga 4 nautical miles ang kalayuon gikan sa Bredco Port.
Suno kay Coast Guard Station Northern Negros Occidental Commander Paterno Belarmino, sakay sa bangka sanday Liberato Sevilla, Joan Infante, Elmer Tiongzon, Jondle Sevilla, Ricky Sevilla kag Arnel Sevilla, tanan residente sang Barangay Catabla, siudad sang Talisay.
Las 4 sang aga nagpalawod ang mga mangingisda apang tungod sa mabaskog nga balod, nabali ang katig sang sakayan kag naglugdang.
Mga las 9 sang aga, nalabayan sila sang tanker ship kag na rescue sang grupo ni Auxiliary Commander Ricky Malayo. Wala sang nasamaran sa mga mangingisda kag nakapauli na sa ila nga lugar.