Anum ka mga employers gin-issuehan sang notice of violation sang Social Security System bangud sang kabilugan nga P3.2M nga delinquent accounts.
Anum ka mga commercial establishment ang ginserbihan sang notice of violation sang katapo sang SSS-Race team sa Bacolod, Talisay kag Silay humalin sang Martes kag Miyerkules.
Kabahin diri ang isa ka drugstore, eskwelahan, retail store, wholesale store, furniture shop kag gas station nga wala naga-remit sang contribution sang ila mga empleyado.
Sa record sang SSS, may 118 tanan ka mga empleyado ang wala maka-avail sang ila SSS benefits bangud sang kapaslawan sang ila mga employers nga mag-remit sang ila contribution.
Gani ginmando ni SSS Visayas West 1 Division Vice President, Dr. Lilani Benedian sa anum ka mga employer nga bayaran ang kapin P3.2M nga delinquent accounts agud nga mapalab-ot sa ila empleyado ang nagakaigo nga benepisyo.
Sa pagpanguna ni SSS Commissioner Jose Julio, ginpaandam sang RACE Team ang mga natungdan nga employers nga i-settle ang ila delinquent accounts antes pa man sila posible pasakaan sang kaso angut sa pagsupak sang Republic Act 11199 ukon ang Social Security Act of 2018.
Nagligad lang nga bulan sang may masobra 2,400 ka mga employers sa pungsod ang ginpasakaan sang kaso tungod sang kapaslawan nga mag-remit sang SSS contribution.