Walo ka gunshot wounds ang naangkon sang anay Sangguniang Bayan member sang Isabela nga gintiro sa Sitio JMA, Barangay Payao sa banwa sang Binalbagan, mga las 5 sang hapon sang Domingo.
Ang biktima ginkilala kay Rodulfo Pajardo, alyas “Dulpo”, 72-anyos, isa ka anay SB member, retired Army kag anay kapitan sang Barangay 4 sa Isabela.
May igo siya sang bala sa nagkalain lain nga parte sang lawas.
Nag-gwa sa imbestigasyon sang PNP nga sakay sa Honda XRM nga motor ang biktima gikan Sitio Manuleta kag padulong Sitio JMA sa gina-arendohan sini nga kampo.
Nagapungko sa iya motor si “Dulpo” bangud nagapahilamon siya sa iya kampo sang mag-abot ang mga naka-bonnet nga suspek sakay sang duha ka mga motor kag ginpa-arakan luthang ang biktima.
Blangko pa ang kapulisan sa identity sang mga suspek kag motibo sa krimen.
Ginsiling ni Police Captain Joelan Vinson, hepe sang Binalbagan PNP, padayon pa ang ila follow-up investigation kag pagpangita sang saksi nga maka-identify sang mga suspek.
Suno sa PNP, wala sang record sa police station ang biktima kag base sa mga panaysayon sang mga tawo, maayo man ang relasyon sini sa iya mga trabahante.*
[sibwp_form id=1]