Ginpahayag sang anay alkalde nga karon nagapapili kongresista nga indi na dapat tagaan atensyon ang pagkambyo sang kolor sa pulitika.
Balik sa Bacolod City Government Center si anay Mayor Evelio Leonardia agud mangampanya upod sa grupo ni incumbent Vice Mayor El Cid Familiaran nga karon nagapapili bilang alkalde.
Upod ang slate sang mga nagapapili sa pag ka konsehal, ila ginsibita ang mga empleyado sa tagsa ka mga departamento kag opisina.
Ginkalipay sang anay alkalde nga karon nagapapili sa pagka-kongresista kontra kay incumbent City Mayor Albee Benitez nga bisan paano mabatyagan pa ang mainit nga pag-abi-abi sa iya sa BCGC.
Pero kasubong sang ila nga opening salvo sa Bacolod Public Plaza, indi na pula nga anay kolor sang Grupo Progreso ang ila ginadala, kundi blue nga nagapakilala grupo sang Asenso.
Para sa anay alkalde indi na importante ang kolor kag nagkalain-lain nila nga Partido bangud ang naga pangibabaw amo ang natukod nga alyansa.
Samtang, sa Barangay Mansilingan naman nangampanya ang grupo nanday Mayor Albee Benitez kag incumbent Congressman Greg Gasataya.
Sa ila nga opening salvo nga gin-updan sang linibo nga supporters sa Paglaum Sports Complex ila ginpatpat ang mga plano para sa ginasuguran nga supercity.