Ginbawian sang kabuhi ang 44-anyos nga amay matapos masungkit sang nagasunod nga pickup truck ang iya ginamaneho nga tricycle sa national highway nga sakup sang Purok Cosmos, Barangay Calumangan sa Bago City, Lunes sang kaagahon.
Nakaangkon sang madamo nga pilas ang driver sang tricycle, nga residente sang Barangay Handumanan sa Bacolod.
Gindala sang Bago City Rescue Team sa Bago City Hospital ang driver sang tricycle apang gindeklarar siya nga dead on arrival.
Nag-gwa sa imbestigasyon sang Bago PNP, nabungguan sang pickup truck ang pang-ulihi nga bahin sang tricycle.
Pareho nga gikan Bacolod City kag padulong Bago ang tricycle kag pickup.
Wala naman ma-ano ang 47-anyos nga driver sang pickup, nga residente sang Brgy. Nanunga sa Hinigaran.
Gindala ang driver sang pickup truck sa Bago Component City Police Station.*