Ginsugudan na sang Bacolod City Police Office ang active shooting simulation exercise sa mga pampubliko nga eskwelahan sa Bacolod kasunod sang mga pagpamahog nga nabaton sang pila ka mga eskwelahan sa Bacolod City.
Ini agud matudluan ang mga estudyante kag mga maestra sang ila obrahon hinali nga may shooting nga matabo sa sulod sang eskwelahan.
Isa man ini ka pamaagi sang kapulisan agud ma-asses ang ila kapasidad sa pag responde sa kaangay nga insidente.
Ginsiling ni BCPO Director Police Colonel Eugene Rebadomia, nga una nga ginpatigayon ang simulation exercise sa mga eskwelahan sa Barangay Granada kag Barangay Alangilan.
Ginahaylo man sang kapulisan ang tagsa ka mga eskwelahan nga makig-angut sa ila agud makapatigayon sang active shooting simulation exercise sa ila tagsa ka eskwelahan.
Nagapanawagan si Rebadomia sa mga ginikanan nga tudluan ang ila mga kabataan nga likawan ang “prank threats” bangud nagatuga ini sang kahangawa sa publiko.
Nagkansela sang klase ang tatlo ka eskwelahan sa Bacolod City sini gid lamang bangud sa kasubong nga rason.
Sa imbestigasyon sang kapulisan, may nakasulat nga “Shooting on July 6” sa isa ka glass window sang isa ka unibersidad sa siudad rason sang pagkansela sang klase tubtob Miyerkules nga adlaw, Hulyo 8.
Nakilala naman sang kapulisan ang mga estudyante nga imbolbado sa amo nga insidente kag nagsiling nga “prank” lamang ato nga sulat.
Sa record sang BCPO may isa pagid ka public high school ang nakabaton sang kaangay nga threat sang Martes nga adlaw.
[sibwp_form id=1]