Naga-idas na ang linya sang luyag magpabakuna sang Pfizer nga brand sang Covid-19 vaccine halin sa third floor pakadto sa gwa sang bacolod city government center kaina sang aga.
Gani agud mapunggan ang pagdugok pa sang tawo, ginhinyo na lang sang katapo sang Task Force Displina ang mga wala pa maka-parehistro sa bakuna nga mag-pauli agud mapaiway ang pag-ginutok.
Ang elementary teacher nga si Engie Pioquinto isa sa mga nagpila agud lang nga matigayon maka-biyahe sa Estados Unidos.
Suno kay Bacolod Emergency Operation Center Executive Director Em Ang, may masobra dos mil ka doses sang pfizer vaccine ang ginpain para sa mga A1 kag A2 category ilabi na para sa mga overseas Filipino workers nga nalakip sa A1.8 category.
May masobra sa sinko mil nga OFW ang nagaparehistro para sa bakuna pero kutob lang sa malab-otan sang supply ang sarang maka-ambit sang Pfizer vaccine.
Yara na sa A1 tubtob A4 category ang vaccination rollout sang siudad. Nalakip diri mga medical frontliners, senior citizens, may co-morbidities, mga negosyante kag iban pa nga frontliners. Pero nagapanugyan ang pamunuan sang EOC nga ginakinahanaglan gihapon sang mga luyag magpabakuna nga mag-register online agud man mapaiway ang pag-ginutok sa mga gintalana nga mass vaccination areas.