Naglinumpat ang mga tawo gikan sa nagadaba-daba nga Buglasan Festival booth sang Canlaon City nga nahamtang sa Freedom Park, Dumaguete City, matapos ini ang nasunog mga pasado las nueve sang gab-i, Miyerkules, Oktubre 21.
Makita sa video ang pagkinaran-karan sang mga tawo samtang nagasinggitan kag nagapangayo sang bulig.
Madasig nga ginlamon sang kalayo ang booth sang Canlaon City , nga ang disenyo amo ang basket nga ginagamit sang mga mangunguma sa tion sang ani, kag sa ibabaw sini amo ang figure sang Bulkang Kanlaon.
Nagresulta ang insidente sa pagkasamad sang siyam ka mga persona, nalakip na ang duha ka mga menor de edad.
Nakaangkon ang mga biktima sang mga paso kag fracture sa ila lawas.
Sa karon, wala pa makapagwa sang resulta sang imbestigasyon ang Bureau of Fire Protection sa kung ano ang gintunaan sang sunog.
Ginkasubo ni Canlaon City Mayor Batchuk Cardenas ang nagluntad nga sunog kag nagpalab-ot sang simpatiya sa tanan nga naapektohan.
Nagpasalig ang alkalde nga siya ang magahatag sang bulig sa tanan nga nasamaran sa insidente, taga Canlaon man ukon pangayaw.
[sibwp_form id=1]