Siyam ka mga banwa kag siudad sa Negros Occidental ang ginbaha.
230 naman ka pamilya ukon 738 ka indibidual ang gin evacuate.
Ilakip ang Bacolod, 28 ka LGU ang nag suspend sang klase subong nga adlaw, Hwebes.
Sa report sang Provincial Disaster Risk Reduction Management Office, as of 11am, July 17, may 181 ka persona ang gindala sa mga evacuation center sa Hinoba-an, 110 naman ka persona sa Cauayan, 20 sa Binalbagan kag 427 sa Isabela bangud sang pagbaha.
Gin-report man ang pag baha sa Kabankalan City, Himamaylan City, Ilog, Moises Padilla kag Hinigaran.
Suno kay Irene Bel Plotena ang pamuno sang PDRRMO light to moderate rains dala sang habagat ukon southwest monsoon ang nag tupa sa probinsya.
Tayuyon ukon continuous ang pag ulan humalin sang kagab-i rason nga nag tuga sang pag baha sa pila ka mga lugar sa sur sang probinsya.
Gin-enhance pa gid sang bagyo Crising ang habagat suno sa kay Plotena.
Depende sa lugar may yara sang kutob sa tuhod ang tubig baha.
Sa Ilog suno kay Plotena may yara sang tubtob sa hawak ang kadalumon sang tubig.
Sa pila ka dalanon may yara sang duha tubtob tatlo ka tapak ang kadalumon.
Gani may mga gin-report nga mga dalan nga temporayo indi ma agyan.
Cloudy skies ukon magal-umon nga kalangitan naman ang yara sa northern Negros.
May gin-report naman nga landslide sa Sipalay City.
Gina paabot suno kay Plotena ang kasubong nga pag ulan bwas nga adlaw, Biyernes.
Yara sa Orange rainfall warning ang Negros Occidental ukon gina paabot ang mabaskog nga ulan, pag baha kasubong man landslide.
Ang mga LGU sang Hinoba-an, Binalbagan, Calatrava, Talisay, Isabela kag Don Salvador Benedicto ang nag suspend sang klase tubtob Biyernes nga adlaw.