Arestado ang walo ka mga persona, lakip na ang lima ka mga taga Iloilo City sa ginpatigayon nga buy-bust operation sa Purok Magtiayon, Barangay 10 sa Bacolod City, Lunes sang kaagahon.
Gin-alegar nagpadulong sa Bacolod ang lima ka mga taga-Iloilo agud mag pangayaw sang basketball kag dala na lagaw sa highlights sang MassKara Festival sang weekend.
Sila kag ang tatlo ka mga taga-Bacolod ang gindakup sang katapo sang City Drug Enforcement Unit kag nakuhaan sang 30 gramos sang ginasuspetsuhan shabu nga may standard drug price nga P204,000.
Naga-edad 22 tubtob 38 anyos ang mga nagkaladakpan.
Ginahulat na lang karon sang CDEU ang resulta sang forensic examination sa mga ebidensya nga ila nakuha, antes ipasaka ang kaso nga pagsupak sang Comprehensive Dangerous Drugs Act of 2002, batuk sa mga gindakup.