Nagdesisyon ang banwa sang Toboso matapos ginpatigayon ang pagsinapol sang local Inter-Agency Task Force nga ipaidalom sa granular lockdown ang barangay proper sang Brgy. Bug-ang bwas nga adlaw.
Suno kay Mayor Richard Jaojoco, mga 700 ka mga puluy-an ang apektado sa amo nga granular lockdown.
May kabudlayan nga nasugata sa contact tracing suno sa alkalde rason nga nagdesisyon ang banwa nga ipadailom sa granular lockdwon ang lugar.
Sa karon may siyam na ka mga taga barangay ang nagpositibo sa COVID-19.
“Amo to ang na desisyonan namon kay daw budlay gid kaayo sa contact tracer, sagi lakat ang tawo. Bwas amon I-granular lockdown ang proper Bug-ang. Kay subong yawan kami contact trace kay damo kaayo close contact.”, suno kay Jaojoco.
Una nga nagpositibo sa virus ang isa ka opisyal sang Department of Education. Nagpositibo man ang pila ka katapo sang iya nga pamilya kag isa ka close contact suno kay Jaojoco.
Sa 61 nga gin-swab kahapon suno sa alkalde may masobra pa sa 40 ang pending ukon gina hulat ang resulta.
Magahatag ang barangay sang napulo ka kilo sang bugas kag 20 ka delata sa mga apektado sang granular lockdown nga maga lawig sang pito ka adlaw.
“Subong pa lang sige na kami padala sa Bug-ang. Pero bwas na lang gid sa aga, balay-balayon namon. And we will just issue sang essential pass per household, para maka gwa sila nga essential nga lakat. One per household”, suno kay Jaojoco.
Magluwas sa Brgy. Bug-ang suno kay Jaojoco nagpatigayon man sang swabbing sa mga katapo sang pulis matapos nga may nagpositibo nga tatlo nlla ka mga kapuod.