Sa bulig sang teknolohiya, irigasyon lakip na mga agricultural inputs, nagapati ang Office of the Provincial Agriculturist nga sarang malab-ot ang target sang probinsya nga 6 metric tons nga rice production kada ektariya.
Ini suno kay OIC-Provincial Agriculturist, Dina Genzola nga upod kay Governor Eugenio Jose Lacson, nagpamuno sa pag panagtag sang 246 ka sako sang binhi sa mga farmer beneficiaries gikan sa Cadiz, Manapla, Ilog kag EB Magalona.
Ang mga nagbaton ang apektado sang kalamidad kaangay sang pagbaha.
Ang ila nga pagbaton ang paagi sa Binhi sang Probinsya Program nga ginpundohan gikan sa 20 percent Provincial Development Fund.
208 sa 246 ka sako sang binhi ang ginhatag sang Negros Occidental Seedgrowers Agriculture Cooperative ukon NOSGACO kag ang 38 ka sako ang gikan sa probinsya.
Ang NOSGACO nga gina tapuan sang 39 ka accredited seed growers/members ang nagbaton sang bulig gikan sa amo nga program kag ang pag hatag nila sang binhi ang kabahin na sang ila nga corporate social responsibility.
Pag panghangkat sang gobernador sa ila amo nga pasakaan sa 6 metric tons ang production sa kada ektariya kag ini masarangan paagi sa certified ukon maayo nga mga binhi.
Yara karon sa 84 to 86 percent ang rice sufficiency sang Negros Occidental.