60 day nga price freeze sa mga lugar nga napaidalom sa state of calamity ang gina patuman sa karon.
Sa advisory nga gin pa gwa sang Department of Trade and Industry, may kaangtanan sa pagpatuman sang Republic Act 7581, gina patuman ang 60 ka adlaw nga price freeze sa tanan nga basic necessities sa mga lugar sakop sang Region 4b, 6, 7, 8, 10 kag ang Caraga.
Sa Kabankalan city, ginapatigayon ang special monitoring sa pagpamuno sang DTI Negros Occidental Consumer Protection Division kag sang Local Price Coordinating Council. Ini sa pagpasiguro nga estable ang supply kasubong man ang presyo sa apektado nga lugar.
Nalakip na sa gina monitor ang mga hardwar stores, water refilling station kag mga naga baligya sang generator sets labi na karon nga mataas ang demand tuga sang kakulang sang supply sang kuryente.
Dapat suno sa DTI maga pabilin ang presyo sang mga balaklon kasubong sang presyo sini antes matabo ang bagyo.
Sarang nga mapasakaan sang kaso ang mga madakpan nga naga supak. Padayon man ang panawagan sang DTI sa mga negosyante nga likawan ang price manipulation kasubong sa hoarding, profiteering kag cartel. Pwede mag report sa hotline: Email: r06.negrosoccidental@dti.gov.ph ukon sa Facebook: DTI Negros Occidental PH ukon sa diin man nga DTI Negosyo Center sa inyo nga lugar.