Nakaluwas kag nadala pa sa ospital ang anum ka tuig nga bata nga babaye sang nagluntad ang sunog sa ila balay sa Purok Active sa Barangay Mandalagan sa Bacolod sang nagligad nga Sabado sang gab-i.
Nag-angkon siya sang 3rd degree burns sa mga butkon kag likod nga bahin sang abaga.
Ginpahayag ni Barangay Mandalagan Punong Barangay Paul Anieve nga kahapon sang nagtaliwan ang bata sa ospital tungod sang komplikasyon kag posible infection sa mga naangkon nga paso sa lawas.
Gin-istorya sang tiyo sang biktima nga si Celso Cabuguas nga sang nakaluwas sadto sa sunog ang pilason nga 6 ka tuig nga bata, nagtinguha pa ini luwason kuntani ang iya isa ka tuig nga manghod nga babaye nga una nga napatay sang masunog ang ila balay.
Ang mag-utod ang ginbilin sang ila iloy nga nagatrabaho bilang caregiver sa ila duha ka mga magulang nga 14 kag 18 anyos nga namiesta antes natabo ang sunog.
Ginsiling ni DSSD head Richelle Verdeprado-Mangga nga nakapalab-ot na sang food assistance ang siudad sa pamilya kag karon ginabuligan sila sa pagproseso sang financial assistance.
Ini magluwas sa burial assistance nga ginahatag sang siudad.
Ang barangay ang nakapalab-ot man sang medical assistance kag natalana magahatag sang dugang nga construction materials para makapatukod gilayon sang balay ang nalisdan nga pamilya.