Ginpangkakas sang Bacolod City Legal Office Enforcement Team ang anum ka mga illegal structure sa kilid sang creek sa GK Village sa Barangay Banago sa Bacolod.
Ginsiling ni Levy Pangue, pamuno sang Enforcement Team, nga 40 ka mga balay sa palibot sang creek ang plano nga kakason sang siudad, agud masugudan sang Department of Public Works and Highways ang pagkutkot sa amo nga creek.
Suno kay Pangue, gin-una anay ang anum ka mga istruktura bangud ini ang alagyan na gid mismo kuntani sang mga heavy equipment sang DPWH.
Makapila naman ka beses nga ginhatagan sang notice to voluntarily vacate ang mga tag-iya sang balay, apang wala pa sa gihapon maghalin.
Lakip sa mga ginpangkakas na ang mga balay, garahe, kag mga balaligyaan damlag pa.
Pagasugudan na sang DPWH ang pagpadalum sang amo nga creek agud makalikaw sa posible nga pag-awas sang tubig kun magbunok ang ulan.
Dugang ni Pangue, kun masugudan na sang DPWH ang desilting, ila naman pangkakason ang mga nabilin nga mga istruktura sa creek.
[sibwp_form id=1]