Nanumpa Lunes sang aga si congressman-elect Emilio “Dino” Yulo kay Negros Occidental Governor Eugenio Jose Lacson sa iya nga katungdanan bilang kongresista sa kinto distrito.
Naga suporta si Yulo sang lihok nga pag balik sang Negros Island Region. Suno sa iya ini ang labing bentaha para sa iya nga distrito. Pila ka mga banwa sa iya legislative district ang naga angut ukon sarang maka agi padulong sa Negros Oriental, kasubong sa La Castellana padulong Canlaon, Isabela padulong Guihulgan.
May mga alagyan pa gid nga posible man nga makalusot sa Oriental gikan sa siudad sang Himamaylan, sa Moises Padilla kag Binalbagan.
Kun matigayon ini ang magadala sang dugang nga pagsanyog suno sa iya. Prayoridad man ni Yulo ang mga arterial roads sa mga nabukid nga bahin sang kinto distrito.
Sa pihak nga bahin naga suporta man si Yulo kay Congressman Ferdinand Martin Romualdez, bilang house speaker. Pabor man si Yulo nga ang masunod nga administrator sang SRA ang maga gikan sa Negros Occidental agudto mas labing mabatyagan niya ang nagakatabo sa industriya lakip na ang mga stakeholders sini.
Indi man malipod nga 66 percent sang national production sang kalamay ang gikan sa probinsya suno kay Yulo.