Lunes nga adlaw, nagrambol sa gwa sang eskwelahan sa Barangay Aguisan, Himamaylan City ang pila ka mga estudyante kag sang Martes, nagluntad ang bun-anay kun diin apat ka mga estudyante ang napilasan.
Imbulbado sa insidente ang mag-utod nga suspek, naga-edad 14 kag 16 anyos, naga-eskwela sa ALS ukon Alternative Learning System, kag ang duha ka mga estudyante sang private school sa Aguisan, naga-edad 16 kag 17 anyos.
Ginsiling ni Police Lt. Peter Genovia, deputy chief sang Himamaylan PNP, nga minor injuries ang naangkon sang mga suspek, apang ang isa sa mga biktima ang nabun-an sa iya nga liog, dughan kag likod.
Nagwa sa imbestigasyon sang PNP nga pabalik na sa eskwelahan ang duha ka mga biktima matapos ang ila lunch break sang sila ang gintawag sang mga suspek nga yara sa waiting shed, agud makig-istorya.
Nagpalapit ang isa sa mga biktima kag siya ang ginsumbag sang suspek sa guya.
Nagdalagan sila sa isa ka sari-sari store kun diin ginbuno sang manghod nga suspek ang isa sa mga biktima, gamit ang ballpen. Nakakuha naman sang kutsilyo ang magulang nga suspek kag ginbuno ang duha ka mga biktima.
Daan nga hiligut-anon ang ginalantaw motibo sa insidente.
Gindala sa Binalbagan Infirmary ang duha ka mga biktima, samtang ginturn-over sa City Social Welfare and Development ang mag-utod nga suspek.
“Actually ang natabuan na nga waiting shed, daw mga 50 meters lang na halin sa private school. Sa ulo-unhan lang gamay, amo na da ang barangay hall sang Aguisan, lapit lang na amo na nakaresponde man to dinalagan ang tanod dayon kag nasapar sila”, suno kay Genovia.
[sibwp_form id=1]