Shadow

35 tanan ka supporters ni Benitez gin isyuhan sang citation ticket kahapon

Makapila man ka beses nga nagpaandam ang katapo sang Task Force Disiplina sa mga nagtipon nga supporters ni anay Third District congressman Albee Benitez sa Bacolod public plaza kahapon.

Tubtob nga pila sa ila ang ginpang-isyuhan na sang citation ticket.

Kabahin na diri ang isa ka senior citizen nga ginpabayad sang dos shientos pesos bangud sang pagsupak sang pagsulundan angut sa social distancing.

Pati si anay board member Patrick Lacson gin-isyuhan man sang citation ticket bangud wala sang faceshield.

Pero wala napaiway ang paglinalinasay sa tunga sang grupo kag mga enforcers bangud may mga traffic enforcers nga nakit-an nga wala man sang faceshield.

Ila man gin reklamo nga may mga katapo sang media nga wala sang face shield pero wala gin pang ticketan.

Ang na suspend nga punong barangay nga si Noli Villarosa sang Barangay Tangub nga supporter man ni Benitez ang nag saway man sa mga supporters sa plaza

Nanindugan naman si Wilfredo Geolingo, pamuno sang Task Force Disiplina nga wala sila sang pinili-an sa pagpatuman sang pagsulundan.

Sandig sa natukod nga executive order angut sa pagpatuman sang general community quarantine with heightened restrictions, ginadumilian gihapon ang mga pagtilipon kag mga party sa gwa man ukon sa sulod sang puluy-an.

Sa kabilugan, may 35 tanan ang naisyuhan sang citation ticket, halos tanan sa ila nagkadto sa plaza para magpakita sang suporta sa kongresista nga damlag nagdeklarar na nga magpapili sa 2022 mayoralty elections sang Bacolod.

Gindugang pa ni Geolingo nga tuga man sang kahangawa sang Covid-19 delta variant mas strikto nga ila igapatuman ang pagsulundan, nalakip na diri ang pagpasiguro nga yara lamang sa 20 tubtob 30 porsyiento ang venue capacity sang mga kalan-an kag iban pa nga commercial establishments.

Leave a Reply

Your email address will not be published. Required fields are marked *

Secured By miniOrangeSecured By miniOrange