Trentay dos tanan ka mga balay nasunog sa Barangay Mambulac sa Silay City kaina sang udto.
Ginbudlayan ang mga bombero sa pag palong sang kalayo kay tuman ka gamay sang alagyan sa Purok Dakutan Dako sa Barangay Mambulac.
Ang mga residente ang nag kinaran karan sa pag salbar sang ila nga mga pagkabutang.
Nag binuligay man ang mga pumuluyo sa pag palong sa kalayo. Ang iban nag kandos sang tubig gikan sa danao para lang may ibasya sa kalayo.
May mga nagsalaka sa mga atop kag ang ini nga poste ang nag aso pa.
Suno sa kay Punong Barangay Hazel Cordero, naglab-ot sa treinta tanan ka mga balay ang totally destroyed samtang duha naman ang parially damaged.
Gina patihan nga kuryente ang ginhalinan sang kalayo kag gina bulubanta nga kapin sa tunga sa milyon ka pesos ang halit nga gintuga sang kalayo.
May gin report nga napilasan sa pagkinarankaran kag may mga nagtaas ang blood pressure.
Temporaryo nga maga tinir anay sa gym ang mga nawad-an sang puluy-an.