Ginsiling ni Bacolod Transport and Traffic Management Department Head Atty. Reuben Mikhail Sabig nga may tatlo na ka traffic enforcers sang Bacolod ang gin-deputize sang Land Transportation Office.
Bangud sini, sarang na nga makapangdakop ang ini nga mga enforcers sa mga nagalapas sa national traffic laws.
Ang BTTMD ang sarang lamang magpatuman sang mga traffic regulations nga nakasaad sa mga ordinansa sang siudad, apang bangud sang deputization, sarang na nga maka issue sang citation tickets gikan sa LTO ang tatlo ka enforcers.
Suno kay Sabig, nagsugod ang deputization bangud sa pangabay man sang LTO sa ila nga buligan sila sa pag-check sang mga registration sang mga pribado nga salakyan.
Dugang pa niya, maga-focus ang tatlo ka enforcers sa pag panakop sang mga nagabiyahe sa dalan nga wala sang nagakaigo nga mga dokumento kag mga wala naga suksok sang helmet.
Sa record sang BTTMD, sa bulan lamang sang Agosto, may ara sang 1,907 ka mga traffic violations sa siudad.
Pinakamadamo nga violation amo ang obstruction sa dalan, illegal parking, kag reckless driving.
[sibwp_form id=1]