Subong nga adlaw ginadumdom ang second death anniversary ni anay Negros Oriental Governor Roel Degamo kag pila ka mga aktibidad ginpatigayon.
Sa post sa iya Facebook Page, naghimo sang sulat si Pamplona Mayor Janice Degamo, ang ti-ayon sang ginpatay nga gobernador.
Suno sa iya, duha na ka tuig ang nagligad sang ginpatay ang anay gobernador pati na ang siyam ka iban pa gid nga mga persona sang ginsulod sila sang aramado nga mga persona sa ila nga balay sa Pamplona, Negros Oriental.
Para kay Mayor Degamo masakit sa gihapon batunon ang natabo pero kaupod niya ang libo-libo nga mga naga suporta sa anay gobernador nga padayon nga naga pangamuyo para sa hustisya.
Nagapasalamat siya sa tanan nga naga suporta sa ila pamilya.
Ginapangamuyo niya man ang kalinong para sa probinsya.
Subong nga adlaw may mga aktibidad nga ginpatigayon sa probinsya kaupod ang provincial government.
May misa kag may programa subong nga hapon sa Freedom Park sa Dumaguete City.