Bisan napaisol ang ginadihon record-breaking mass wedding natigayon nga nakasal ang 28 ka mga magkahagugma sa Bacolod City Government Center sini nga hapon.
Indi na pwede mapaisol ang kasal gani sang ini lang nga hapon natigayon gid man ang regular nga mass wedding para sa 28 ka mga pares sa government center.
Si Vestilo Cuer nga taga-Sipalay kag ang iya live-in partner nga si Mary Grace Pabon sang Barangay Vista Alegre sa Bacolod ang pito na ka tuig nga naga-upod kag may isa na ka anak. Gani nalipay sila nga natigayon ang seremonya.
Suno sa ila, naka-schedule na tanan halin sa pag-leave sa trabaho kag pag-inabot sang bisita amo nga naghinyo sila sa siudad nga madayon ang na-set nga schedule. Gani ginpakamaayo naman ni Mayor Albee Benitez nga matigayon ang regular nga mass wedding para sa ila.
Kabahin sila kuntani sa 2,053 ka mga magkahagugma nga kalaslon para sa record-breaking nga mass wedding sang siudad. Ang presidential couple nga sanday Presidente Ferdinand Marcos Jr. kag Liza Araneta-Marcos ang major sponsor sa napaisol nga mass wedding sang siudad.