200 ka mga safety check stickers ginpakakas sang BTTMD sa mga traditional jeepney nga wala sang provisional authority.
Sa masobra 600 na ka mga traditional jeepney nga natapikan sang safety check stickers, nag-gwa nga kapin sa 200 diri ang indi qualified bangud wala sang provisional authority.
Gin-ako ni Bacolod Traffic and Transportation Management Department OIC Patrick Lacson nga may kapaltahan sila sa pag-usisa sang supporting documents sang mga applicants nga nakakuha sang insurance pero expired ang mga PA.
Gani humalin sang nagligad nga semana ginsuguran nila ang pag pangkakas sang mga stickers nga ila natapik sa mga traditional jeepney.
Ang safety check stickers ang ginapanapik sa mga jeep nga kumpleto sa insurance kag permits bilang pag pasiguro sa mga pasahero nga lehitimo ang mga naga byahe nga traditional jeepney sa siudad.
Nangin pamaagi ini sang BTTMD para ma-inventory ang kadamuon sang mga traditional jeepney nga asta karon wala maka pa-consolidate kag colorum.