Natalana nga ipanghatag sa mga pampubliko nga eskwelahan sa siudad sang Bacolod ang 200 ka mga handheld metal detectors.
Ginsiling ni Atty. Jose Marty Go, Secretary to the Mayor, wala sang may gingasto ang siudad sa pagbakal sini bangud gin-donate ini tanan sang mga abyan ni Mayor Greg Gasataya.
Dugang niya, ginahulat nalang sang siudad ang listahan sang mga eskwelahan gikan sa Department of Education Schools Division of Bacolod agud matumod kun pila ka mga detectors ang ihatag sa tagsa ka eskwelahan.
Suno naman kay Mayor Gasataya, ginahanda na sang siudad ang pagbakal sang mga walk through metal detectors para sa mga dalagko nga mga eskwelahan.
Sandig sa plano sang local school board, ang mga eskwelahan nga may masobra sa 2,000 ka mga estudyante ang pagabutangan sang mga walk through nga metal detectors.
Nagpasiguro man si Gasataya nga ginatinguhaan sang siudad nga mapabaskog ang security sa mga eskwelahan agud mapatuman ang kalinong.
[sibwp_form id=1]