Sa banwa sang Ilog patay ang biktima nga ginkilala sa kay alias “Oscar” nga gin-alegar gintiro ni Alex Roca, 54 anyos, nga isa ka barangay kagawad sa Sitio Montello, Brgy Pinggot banwa sang Ilog.
Sa imbestigasyon sang kapulisan, si Roca kaupod ang mga barangay tanod, purok chairman kag pila ka mga residente ang nag responde sa isa ka reklamo gikan sa kay Ramon Bikas kun sa diin ini ang ginlagas sang biktima nga may dala nga binangon.
Sang nag-abot sa lugar, gin hanaan ni Bikas sang binangon ang biktima nga si Roca rason kun ngaa ini ang nagpalupok sang armas kag naigo sa tiil si “Oscar”.
Sang hana liwat nga lab-on sang biktima si Roca, liwat ini nga gintiro sa dughan nga nangin rason sang iya kamatayon. Yara na karon sa kustodiya sang Ilog PNP si Roca.
Sa banwa naman sang Hinigaran, patay si Ryan John Gelisanga, 39 anyos isa ka mangunguma sa Brgy. Camalobalo matapos tiruhon sang wala pa matumod nga mga suspetsado sang Hulyo 14.
Base sa pahayag sang himata sang biktima, nagalakat si Gelisanga sa tunga sang kampo sang ini ang makabati sang lupok sang armas luthang.
Sang ini ang nagwa, iya nakita nga nagahamyangon na ang biktima kag nagapaligo sa kaugalingon sini nga dugo.
Gin hingagaw pa dala ang biktima sa health facility sang banwa apang gin deklara ini nga dead on arrival.
Nakuha sa crime scene ang slug sang .45 caliber kag 9mm cartridges.
Tubtob karon wala pa matumod ang mga suspek kag motibo sa krimen. Nakaangkon siya sang siyam tanan ka igo sang bala sa lawas.