Nakuhaan sang CCTV footages ang paglabay sang tanker truck sa Barangay Sagua Banwa sa Valladolid, kun sa diin makita nga wala man sang nangin problema sa pagpadalagan sang driver sang fuel tranker nga naga-usoy gikan sur kag padulong sa direksyon sang Bago City mga pasado las kwatro Domingo sang hapon.
Apang pag-abot sa Brgy. Palaka, makita sa dash cam video nga gin-arangka sang tanker truck ang mga food stalls sa higad sang boulevard.
Ginsiling ni Police Master Sergeant Eduardo Combong, case investigator sang Valladolid PNP, natulogan ang driver sang tanker truck kag sang makabugtaw, nag-apply sang preno ang driver base sa mga skid marks nga makita sa dalan, ugaling tuman na siya kalapit sa mga food carts.
Bangud sa impact, nagkalaguba ang mga food stalls kag nabunggoan ang tatlo ka mga vendors.
Dead on arrival sa ospital si alyas “Ling”, 36-anyos, kag napatay Domingo sang gab-i ang 17-anyos nga dalagita, taga Valladolid. Samtang si alyas “Mike”, 19-anyos, ang karon nagapabilin sa Bacolod Adventist Medical Center.
Maayo na lang suno sa imbestigador nga wala na sang dugang pa nga naulamid sa insidente, bangud sa nasambit nga lugar nga gina tawag nga Boulevard, kada hapon tubtob gab-i, masami nga madamo sang tawo nga nagapondo agud magpaliwa-liwa, maglantaw sang sunset ukon magbakal sang pagkaon sa mga food carts.
May pila ka mga concerned citizens ang nagpanawagan paagi sa social media nga pauntaton na ang operations sang mga food stalls sa Valladolid Boulevard agud malikawan ang kasubong nga insidente.
Ginatinguhaan sang Valladolid PNP nga mapasaka subong nga adlaw ang kaso nga Reckless Imprudence Resulting in Homicide batok sa 57-anyos nga driver nga si alyas “Jr”, taga Brgy. Handumanan sa Bacolod.
Kun indi mahingagaw ang pagpasaka sang kaso sa driver, siya ang iga-release kung matapos na ang 18 oras nga reglementary period.
[sibwp_form id=1]