Humalin sa kapistahan sa Dinagsa Festival sa Cadiz City, wala na makalab-ot pa sa ila nga mga balay ang duha ka soltero matapos mabunggo sa naga park nga truck ang ila nga motorsiklo sa Access Road sa bahin sang Barangay Efigenio sa Talisay City kagab-i.
Ang biktima amo sanday Nataniel Conde, 18 anyos kag Alvin Bendor, 19 anyos.
Sa imbestigasyon sang Talisay PNP, gikan Cadiz City, naghapit ang mga biktima sa ila nga himata sa Talisay City kag papauli na kuntani sa Silay City.
Nagadalagan ang motorsiklo sang mga biktima nga naga angkasanay papauli, sang ila mabungguan ang truck nga naga park sa kilid sang dalan.
Pareho nga may helmet man kuntani ang mga biktima suno sa pulis apang naglabog sila dala man sang impact sang ila pagkabunggo.
Gin-detain naman sa Talisay PNP sa karon ang driver sang truck.