Duha ka typhoid related deaths ang na-record sang Negros Occidental as of January 18. Nagsaka naman sa 100 percent ang typhoid cases sa probinsya.
Suno kay Dr Girlie Pinongan, ang Provincial Health Officer, ila na nga gina usisa ang source of water sa mga apekatado nga lugar, lakip na ang pamaagi sa pag handa nila sang pagkaon.
Isa ka 69 anyos nga lalaki ang napatay sa Victorias kag isa naman ka 72 anyos nga babaye ang napatay sa Isabela.
Pero suno kay Pinongan ang mga napatay indi man gikan sa mga lugar nga may mataas nga kaso sang typhoid fever.
As of January 18, 80 ang kaso sang typhoid fever nga na-report sa probinsya.
Sa kasubong nga tion sang 2024, 40 cases ang na-record.
Rason nga nag pa gwa ang probinsya sang typhoid fever advisory para man maka pangaman ang publiko batuk sa masakit nga ginatuga sang salmonella typhi bacteria nga naga lapta paagi sa na contaminate nga pagkaon ukon tubig ukon close contact sa isa ka persona nga apektado na sang amo nga masakit.
Pila sa mga sintoma sini ang paghilanat, sakit sa ulo, palangluya, loss of appetite, ayhan diarrhea ukon constipation kag abdominal discomfort suno sa PHO.
Sa record sang PHO, may pinaka mataas nga na-report nga kaso sang typhoid fever ang Kabankalan – 16.
Naga sunod naman ang Hinoba-an nga may yara sang 13 cases.
May tatlo ka mga barangay nga gina check man bangud may yara sang clustering of cases ukon may na record nga indi magnubo sa duha ka kaso sang typhoid.
Pero wala na ginsiling pa ni Pinongan kun diin ini nga mga banwa ukon siudad nga may clustering of cases.
Nagapanawagan ang PHO sa publiko nga siguraduhon nga malimpyo ang pamaagi sa pag handa sang pagkaon, naga panghugas sang kamot kag kun indi sigurado sa source sang tubig maayo nga pabukalan.
“Kay may death kita nga duha nga typhoid related. Amo na nag pa release gid kami sang advisory parte sa typhoid aside from dengue. Amo to ginhambal ko kay Gov ma-release kita para ma aware man ang tawo, basi man bala may food preparation nga more than 4 hours nga naluto na kag gin pangkaon, whatsoever”, suno kay Pinongan.