Nangin masulhay ang pagbukas sang klase sandig sa monitoring sang Negros Occidental Schools Division magluwas sa pila ka mga eskwelahan nga ginpaiway ang pagpanagtag subong nga adlaw sang mga module bangud sang ginpatigayon nga disinfection.
Suno kay Ian Arnold Arnaez, ang PIO sang DepEd Negros Occidental Division, may eskwelahan sa Victorias kag Binalbagan ang nag paiway anay sang distribution sang module para mag disinfect bangud sang exposure sa Covid-19 cases.
Subong man nga adlaw ang last day para sa enrollment suno kay arnaez, pero basta wala pa man nagsobra sa 20 porsiento sa total class days ang na miss ukon wala ma eskwelahan sang estudyante sarang sa gihapon sila ma accommodate sang eskwelahan. Nagdangat na sa 79 percent ang naka pa enrol base sa datus nila sang Biernes suno kay Arnaez.
Sa Negros Occidental High School naman, may pila ka mga ginikanan ang nagpila sa help desk para pat-uron ang enrollment status sang ila kabataan.
Paathag ni Mila Abanales Assistant School Principal, pila sa concerns amo nga wala sa masterlist ang ila kabataan, ukon may double entry.
Kun sadto, mga 80 percent ang nagpili sa digital distance learning karon nagnubo ini. Mga 50 percent karon ang nagpili sang digital distance learning kag 48 percent ang modular print. Nakahanda naman ang mga classroom para sa limited face to face learning enkaso nga matugutan ini. Tig 25 ka estudyante sa kada classroom ang paga tugutan.