Mga trabahador sa kampo ang naka sapo nga may ginlubong nga mga persona sa Hacienda San Roque, Brgy. Cubay sa La Carlota City Domingo sang aga.
Ginkilala ang mga biktima nga sanday alyas Follow-up, 29-anyos kag alyas Atong, 32-anyos. Lunsay mga taga Brgy. 6 sa Bacolod.
Suno sa kay Police Captain Rosinie Cabuena, Deputy Chief of Police sang La Carlota City PNP, nagpadulong ang ila nga mga live-in partner sa La Carlota agud usisaon ang mga nasapwan nga bangkay kag ila nakumpirma nga ila gid man nga kahagugma ang mga ginlubong didto.
Suno sa PNP, base sa panugiron sa mga live in partner sang duha ka biktima, humalin pa sang nagligad nga adlaw nga wala sila makapauli.
Suno pa sa pulis, una nga naglakat si Atong kag nagsunod si Follow-up pero wala mahibaluan sang ila mga partner kun diin sila nagkadto.
Nakabaklid ang mga bangkay kag may mga lagub sa lawas.
Gina hulat pa ang post mortem examination sa bangkay sang duha para matumod kun ano ang ila ginkamatay.
Padayon ang imbestigasyon sang PNP sa sini nga kaso.