Gin pasa-pasahan sa social media ang video sang grupo sang mga kabataan nga naga singhot sang solvent.
Suno sa DSSD Bacolod, 17 tanan ka mga kabataan ang ila tigayon na-rescue sa sulod lang sang isa ka semana
Sa video nga gin-post sang isa ka netizen, makita ang pagtipon-tipon sang kapin napulo ka mga kabataan sa gwa sang Capitol Lagoon sa Bacolod City samtang nagabitbit sang rugby.
Suno kay Richelle Verdeprado-Mangga, pamuno sang Department Social Services and Development-Bacolod City, anum sa mga kabataan sa video ang na-identify na sang otoridad.
Apat sa ila ang makapila na nga na-rescue sang DSSD apang nagabinalik sa gihapon sa dalan. Matapos nga na-rescue ang mga kabataan, ginpaidalum sila sa counseling kag liwat naman nga ginbalik sa mga ginikanan.
Sa record sang DSSD, 17 ka mga kabataan nga yara sa dalan ang ila nga na rescue sa sulod lamang sang tinalikdan nga semana.
Gin-ako man ni Mangga nga may kabudlayan sila sa pagkuha sa mga bata sa dalan bangud ang ginikanan nila, sa dalan man mismo nagatinir.
Kun mapamatud-an nga may kapabayaan ang ginikanan sa ila mga kabataan, posible nga makakasan sila sang parental authority kag ibutang sa paghinakop sang DSSD ang ila mga bata nga nagatinir sa dalan.
Nagapangabay man ang DSSD sa publiko nga likawan ang paghatag sang kwarta sa mga bata nga nagapangalimos sa dalan bangud ginadumilian ini base sa ordinansa sang siudad.
Dugang pa niya, likawan man ang kuntani ang pagpakita sang itsura sang mga bata, ilabi na kon ginapakita ini sa social media.
[sibwp_form id=1]