Natapos na sini nga Miyerkules ang 15 working days nga ginhatag sang Bacolod City Legal Office sa AMA Computer College agud makakuha sang ila business permit sandig sa damlag notice nga gin serbe sa ila.
Ginsiling ni Atty. Marty Go, Secretary to the Mayor, nga tubtob sa karun wala pa makatapos proseso ang eskwelahan sang ila mga requirements agud maka renew sang business permit.
Sang Lunes, nagpadala sang sulat ang AMA Computer College sa siudad agud maghatag sang update sa ila pagproseso sang ila permit.
Sandig sa sulat, na-comply na sang eskwelahan ang tanan nga dokumento lakip na ang City Health Office nga clearance kag nabayaran naman sini ang tanan nga mga balayran.
Apang, wala pa sa gihapon makatapos proseso ang eskwelahan sa pagkuha sang clearance sa Bacolod Environment and Natural Resources Office ukon BENRO, nga isa sa mga requirements sa pag renew sang permit.
Suno sa ila, ginahulat nalang nila nga makadtuan sila sang BENRO para mag-inspect ang pasilidad, apang wala pa sang available nga personnel ang BENRO.
Iga-refer na sang Business Permits and Licensing Office sa City Legal Office ang pag-issue sang nagakaigo nga legal action sa eskwelahan sa Hwebes.
Sandig sa pagsulundan sang siudad, kinahanglan nga pasirad-an ang isa ka establisimiento nga wala pa maka renew sang permit matapos ang ika-duha nga notisya.
Nangin kontrobersyal ang AMA Computer College matapos nga wala sini ginpasaka sa graduation rites ang masobra 150 ka mga estudyante bangud sa ginapatihan kakulangan sa dokumento kag balayran.
Sang Martes, Hulyo 21, naghiwat sang isa ka special graduation rites ang eskwelahan para sa mga naapektohan nga estudyante.
259 ka mga estudyante ang nagpakigbahin sa amo nga seremonya, kaupod ang ila mga ginikanan.
[sibwp_form id=1]