Patay ang isa ka pedestrian, samtang pilason naman ang iya upod matapos ginsaga-id sang tricycle nga ginamaneho sang hubog nga driver sa Purok Mabinuligon, Barangay Maricalum sa Sipalay City sang Sabado.
Gindala sang Sipalay Rescue Team ang duha ka mga pedestrians, apang nagtaliwan ang 18-anyos nga lalaki nga ginkilala kay alyas “Jiboy”.
Ginsiling ni Lt. Cipriano Lumanog III, deputy chief sang Sipalay PNP, nakagwa na sa ospital matapos ginbulong ang 22-anyos nga lalaki nga ginkilala naman kay alyas “Jason.”
Base sa traffic investigation, papauli na ang duha ka mga lalaki kag nagalakat sa higad sang dalan apang sila ang na-sideswipe sang tricycle nga gina-maneho sang 58-anyos nga driver.
Wala nagpundo ang driver nga si alyas “Edwin” kag nagpalagyo, apang sa follow-up operation, siya ang nadakpan sang personnel sang Sipalay PNP.
Suno kay Lumanog, yara sa impluwensya sang makahulubog nga ilimnon ang driver sang tricycle.
Detained sa custodial facility sang Sipalay PNP ang driver kag plano sang pamilya sang soltero nga napatay, nga pasakaan siya sang kaso nga Reckless Imprudence Resulting in Homicide and Physical Injury.*