Isa ka balay ang naguba kag pito ka iban pa nga balay ang nahalitan sang magluntad ang lahar flow sa Barangay Biak na Bato sa La Castellana sang Sabado, Mayo 24.
Ini suno sa pamuno sang La Castellana Municipal Disaster Risk Reduction Management Office, John de Asis, pero, wala naman sang pumuluyo nga nasamaran bangud humalin pa sang Disyembre ini sila ang gin-evacuate na.
Ginsiling ni Office of the Civil Defense Regional Director, Donato Sermeno, III, nga mga 6.2 kilometers na humalin sa crater sang bulkan ang area nga gin-igo sang lahar flow kasunod sang pagbubo sang ulan sa sulod sang isa ka oras.
Sabado sang aga temporaryo nga indi malabyan ang natungdan nga bahin sang highway sang Biak na Bato tuga sang pag overflow sang lahar gikan sa Ibid Creek sakop sang Sitio Tamburong.
Ginbululigan sang La Castellana LGU, PDRRMO, DPWH, Red Cross, Cadiz LDRRMO, BFP La Castellana kag iban pa gid nga private organization ang clearing operations.
Sang hapon sang Sabado mismo na clear na ang lugar kag liwat nga maagyan.
Pero kay may mga nabilin pa nga debris dala sang makapila ka beses nga paglupok sang bulkan suno kay Sermeno indi man malayo nga kun mag sige bubo ang ulan may ma anod sa gihapon.
Ginasulit man sang OCD ang istrikto nga monitoring sa mga border sa 6km danger zone.
“Huo, passable na siya. Pero gina advise naton nga medyo huluhugton. Kis-a may kita kita may dala nila nga bata naga sulod, although naga gwa man sila, tani ang mga bata indi na pag dal-on. I-see to it gid nila gina log nila. Open man kita sa window naton from 6am to 4pm. Kun storyahon mo lang ang mga pumuluyo ang isa nga naapektuhan ang palangabuhian” suno kay Sermeno.