Nagalakat ang welder sa dalan sang Hacienda Siason, Barangay Caliban sa banwa sang Murcia, Negros Occidental, sang siya ang gintiro sang wala pa makilal-an nga mga suspek, pasado las 6 kaina sang aga.
Padulong kuntani ang 58-anyos nga lalaki sa iya gina-obrahan sa Bacolod City. Masami ini nga aga pa nagahalin sa ila balay agud nga magtrabaho.
Naggwa sa imbestigasyon sang Murcia PNP nga ginsugata sang mga suspek ang biktima kag gintiro.
Suno sa mga residente malapit sa lugar, nakabati sila sang apat ka mga lupok.
Blangko pa ang kapulisan sa identity sang suspek kag motibo sa insidente.
Suno kay Police Major Sherwin Fernandez, hepe sang Murica PNP, padayon pa sila sa pagpangita sang lead tungod suno sa pamilya kag gina-obrahan sang biktima, wala ini sang kontra.