Water security plan luyag mapasiguro ni Mayor Albee agud masolusyunan ang kakulang sang water supply.
Sini nga semana natalana pirmahan sang Baciwa-Primewater ang separado nga kontrata para sa dugang nga kapin 15 million liters a day nga supply sang tubig.
Ini ang ginapaabot ni Mayor Albee Benitez nga makapahagan-hagan sang kakulang sang water supply sa Bacolod ilabi na karon nga tig-ilinit.
Sa pagsinapol upod sa pamunuan sang Baciwa-Primewater ginpasiguro sang alkalde ang pagtukod sang water securty plan agud masolusyunan ang kakulang sang supply sang tubig.
Nagligad lang nga semana sang ginmando sang alkalde ang pag review sang Joint Venture Agreement sang Baciwa kag Primewater bangud sang kapaslawan sang water concessionaire nga mapalab-ot ang serbisyo sa mga konsomedor.
Nagapati siya nga dapat magbayad sang penalidad ang baciwa sa mga consumers nga malawig na nga naperwisyo sa sahi sang serbisyo sang Baciwa -Primewater kabahin na diri ang masami kolor iced tea kag kape nga tubig nga ila pa ginabayaran kada bulan.